azatutyun.am: Ներխուժումն Ուկրաինա ՄԱԿ-ի կանոնադրության և միջազգային իրավունքի կոպիտ խախտում է, Կազանում Ռուսաստանի նախագահ Վլադիմիր Պուտինին ասել է ՄԱԿ-ի գլխավոր քարտուղար Անտոնիո Գուտերեշը։
BRICS-ի գագաթնաժողովի արդյունքներով ՄԱԿ-ի հայտարարության մեջ նշվում է, որ Գուտերեշը վերահաստատել է վերջին՝ 2022-ի ապրիլի հանդիպման ժամանակ ռուսական ներխուժման վերաբերյալ իր դիրքորոշումը։
ՄԱԿ-ի ղեկավարն, ում այցը տեղի է ունենում Ռուսաստանի կողմից ուկրաինական քաղաքների և ենթակառուցվածքների վրա շարունակվող հարձակումների ֆոնին, հանդիպումից առաջ ձեռք սեղմելով լուսանկարվել է Պուտինի հետ։
Ավելի վաղ Պուտինի ներկայությամբ գագաթնաժողովի պատվիրակների առջև ելույթում Գուտերեշը կոչ էր արել «արդար խաղաղություն» հաստատել Ուկրաինայում։
«Մեզ խաղաղություն է պետք Ուկրաինայում: Արդար խաղաղություն՝ հիմնված ՄԱԿ-ի կանոնադրության, միջազգային իրավունքի և Գլխավոր ասամբլեայի բանաձևերի վրա», – ասել է Գուտերեշը, ում ներկայությունը գագաթնաժողովին առաջացրել է Կիևի զայրույթը:
«ՄԱԿ-ի գլխավոր քարտուղարը մերժել է Ուկրաինայի հրավերը մասնակցելու Շվեյցարիայում առաջին գլոբալ խաղաղության գագաթնաժողովին», – հոկտեմբերի 22-ին հայտարարել է Ուկրաինայի արտգործնախարարությունը՝ հավելելով՝ «սակայն նա ընդունեց ռազմական հանցագործ Պուտինի հրավերը: Սա սխալ ընտրություն է։ Դա չի նպաստում խաղաղությանը, այլ միայն վնաս է հասցնում ՄԱԿ-ի հեղինակությանը»:
