Ադրբեջանի նախագահի աշխատակազմը հաղորդագրություն է տարածել Արցախի պատվիրակության հետ այսօր Եվլախում տեղի ունեցած հանդիպումից:

Մասնավորապես, հանդիպումը գնահատվել է «կառուցողական», միջավայրը՝ «դրական»: Ըստ հաղորդագրության՝ հանդիպմանը «քննարկումներ են ծավալվել Ադրբեջանի սահմանադրության և օրենքների հիման վրա Ղարաբաղի հայ բնակչության վերաինտեգրացիայի, ենթակառուցվածքների վերականգնման և դրանց աշխատանքի կազմակերպման վերաբերյալ հարցերի շուրջ»:

Ադրբեջանական կողմի ներկայացուցիչը ներկայացրել է ռեինտեգրացիայի շուրջ ծրագրերը։

Պայմանավորվածություն է ձեռք բերվել առաջիկայում հաջորդ հանդիպումը անցկացնելու վերաբերյալ։

Հիշեցնենք՝ երեկ ռուս խաղաղապահների միջնորդությամբ պայմանավորվածություն էր ձեռք բերվել ժամը 13։00-ից ռազմական գործողությունների ամբողջական դադարեցման մասին։ Այնուհանդերձ, դրանից հետո էլ Ադրբեջանը պարբերաբար շարունակել եւ շարունակում է կրակ արձակել։

Ըստ հրապարակված փաստաթղթի՝ համաձայնություն էր ձեռք բերվել դուրս բերել Հայաստանի Հանրապետության՝ [Արցախում] մնացած զինված ուժերը ռուս խաղաղապահ զորակազմի տեղակայման գոտուց, լիարժեք զինաթափել «Լեռնային ղարաբաղի պաշտպանության բանակի» զինված խմբավորումները, դուրս բերել ծանր տեխնիկան ու սպառազինությունը Լեռնային ղարաբաղի տարածքից՝ դրանց շուտափույթ ուտիլիզացման նպատակով:

Միաժամանակ որոշվել էր, որ վերաինտեգրման հարցերը կքննարկվեն տեղի հայ բնակչության հետ հանդիպման ժամանակ։

Այսօր արդեն Եվլախում կայացել է արցախյան և ադրբեջանական կողմերի հանդիպումը։ Արցախյան կողմից բանակցությունների մեկնել էր Արցախի արտաքին հարաբերությունների մշտական հանձնաժողովի անդամ Դավիթ Մելքումյանը, իսկ ադրբեջանական կողմից՝ խորհրդարանական պատգամավոր Ռամին Մամեդովը, որին Ալիևը նշանակել է Ղարաբաղի տարածաշրջանի հայ բնակիչների հետ շփումների պատասխանատու։

Արցախյան կողմից հանդիպման վերաբերյալ պաշտոնական հաղորդագրություն առայժմ չկա։