tert.am: Իրանի զինված ուժերի գլխավոր շտաբի պետ Մոհամմադ Բաղերին չորեքշաբթի այցելել է Ադրբեջանի հետ համատեղ սահման՝ ստուգելու հյուսիսային սահմանների անվտանգային իրավիճակը, հայտնում է mehrnews.com-ը։
Իրանի Իսլամական Հանրապետության բանակի գլխավոր հրամանատարի և Զինված ուժերի գլխավոր շտաբի հրամանատարների տեղակալների ու ավագ հրամանատարների ուղեկցությամբ՝ Բաղերին այցելել է Ադրբեջանի հետ Իրանի ընդհանուր սահմանը՝ Փոլդաշտում և Արասի շրջանում ծանոթանալու այնտեղ տեղակայված զորամասերի պատրաստության վիճակին և հանդիպելու սահմանապահների հետ։
Իրանցի գեներալը տեսչական այցի ընթացքում ընդգծել է. «Այսօր զինված ուժերի զսպող ուժն ավելի բարձր է, քան երբևէ, և զինված ուժերի բոլոր ստորաբաժանումները լիովին պատրաստված են»։
Բաղերին նաև ասել է, որ այցի նպատակը Իրանի և Ադրբեջանի միջև ընդհանուր սահմանին պասիվ պաշտպանության վիճակի ստուգումն է։
Բանակի գլխավոր հրամանատար, գեներալ-մայոր Աբդոլռահիմ Մուսավին այցի ընթացքում ասել է, որ ուժերը գտնվում են պատրաստության գագաթնակետում և մշտապես հետևում են հակառակորդի քայլերին, ինչպես նաևբարձրացնում են իրենց մարտունակությունը՝ արդիականացնելով տեխնիկան։
