ՌԴ-ի կողմից Վրաստանի և ՌԴ-ի միջև ուղիղ չվերթների արգելքի վերացումից հետո, այսօր՝ չորս տարի անց, առաջին թռիչքն է իրականացվել Մոսկվայից Թբիլիսի։
Թբիլիսիի օդանավակայանի մոտ բողոքի ակցիա է տեղի ունենում՝ ընդդեմ Վրաստանի և Ռուսաստանի միջև ուղիղ ավիաչվերթների վերականգնման։
Նշվում է, որ ՆԳՆ-ն ուժեղացրել է անվտանգության միջոցառումները օդանավակայանի հարակից տարածքում։ Ցուցարարները փորձել են մուտք գործել օդանավերի ժամանման վայր, սակայն ոստիկանական ուժերը թույլ չեն տվել։ Sputnik Georgia-ի հաղորդմամբ՝ ոստիկանությունը բերման է ենթարկել 6 հոգու։
Հիշեցնենք, որ մայիսի 10-ին ՌԴ նախագահ Վլադիմիր Պուտինի հրամանագրով հանվել է ռուսական ավիաընկերությունների՝ դեպի Վրաստան թռիչքի արգելքը։
Վրաստանի նախագահ Սալոմե Զուրաբիշվիլին ուղիղ չվերթների վերսկսումը հերթական սադրանք է որակում։ Իսկ Վրաստանի ԱԳ նախարար Իլյա Դարչիաշվիլին ողջունել է ռուսական կողմի որոշումը՝ հայտարարելով, որ այդ քայլը «կթեթևացնի իրենց քաղաքացիների ամենօրյա կյանքի պայմանները և նրանց ազատ ու հեշտ շփվելու, ճամփորդելու հնարավորություն կտա»։
ԱՄՆ-ն իր հերթին նախազգուշացրել է Վրաստանին, որ եթե վերսկսվեն ուղիղ չվերթները ՌԴ-ի ու Վրաստանի միջև, դա կստիպի Միացյալ Նահանգներին պատժամիջոցներ կիրառել վրացական ավիաընկերությունների դեմ, որոնք ներմուծման և արտահանման հսկողության տակ են։
Լուսանկարում՝ ռուսական «Ազիմուտ» ավիաընկերության՝ Թբիլիսի ժամանած ինքնաթիռը
