Հայաստանում Իրանի դեսպան Աբբաս Բադախշան Զոհուրին հերքել է տեղեկությունները, ըստ որոնց՝ Իրանը փակել է Նախիջևանից Բաքու ճանապարհը։ Այս մասին նա հայտնել է news.am-ին տված կարճ հարցազրույցում։
Դեսպանը անդրադարձել է նաև Լաչինի միջանցքում տիրող իրավիճակին։ Հիշեցնենք՝ արդեն 10-րդ օրն է, ինչ մի խումբ ադրբեջանցիներ բնապահպանական պատճառաբանություններով փակել են միջանցքը, և Արցախի կապը Հայաստանի հետ կտրված է։
«Իրանի Իսլամական Հանրապետության պաշտոնական դիրքորոշումը մշտապես բարձրաձայնել են Իրանի պաշտոնյաները՝ հարգել տարածքային ամբողջականությունը և երկրների ինքնիշխանությունը։ Իրանի միշտ մատնանշել և կարևորել է հումանիտար հարցերը, որոնք Լաչինի միջանցքի փակման արդյունքում առաջացել են, և դա շատ կարևոր է։ Խնդիրների լուծման լավագույն եղանակը բանակցություններն են և բարիդրացիական պայմաններում բանակցություններ վարելը և ուշադրություն դարձնել հումանիտար հարցերին»,- նշել է Աբբաս Բադախշան Զոհուրին։
Մի քանի օր առաջ էլ Իրանի ԱԳՆ խոսնակ Նասեր Քանանին հույս էր հայտնել, որ Լաչինի միջանցքի շրջափակման վերացման հարցը արագ կլուծվի։ «Իրանի Իսլամական Հանրապետությունը մշտապես շեշտը դրել է Ադրբեջանի և Հայաստանի միջև վեճերի խաղաղ կարգավորման վրա»,- նշել էր նա։
Անդրադառնալով Ադրբեջանական կողմի այն հայտարարություններին, թե Իրանի ներկայացուցիչները մի քանի անգամ անօրինական կերպով այցելել են Լեռնային Ղարաբաղ, դեսպանը նշել է․ «Այո՛, եղել է նման հարցի բարձրացում ադրբեջանական կողմից, բայց իրանական կողմը դեռ ուսումնասիրության փուլում է, փորձում է ճշգրտել տվյալների հավաստիությունը, դեռ հավաստի ինֆորմացիա չունենք»։
Խոսքը դեռ անցած ամիս ադրբեջանական մամուլում տարածվող տեղեկությունների մասին է, թե, իբր, Իրանի 14 քաղաքցիներից կազմված խումբ է այցելել Արցախ՝ «դիվերսիոն և ահաբեկչական վարժանքներ անցկացնելու»։
Իսկ հարցին, թե արդյո՞ք Իրանը Հայաստանի պաշտպանության ոլորտում համագործակցության խորացում նախատեսում է, դեսպանը պատասխանել է․ «Իրանը և Հայաստանը հարևան և բարեկամ երկրներ են, որոնք մշտապես ունեցել են շատ լավ համագործակցություններ տարբեր ոլորտներում, տարբեր հարցեր քննարկվում են, սա ներքին թեմա է, եթե հարկ լինի, կբարձրաձայնվի»։
