Ազգային ժողովում մեկնարկել է արտահերթ նիստ։
Նիստի սկզբում ԱԺ նախագահ Ալեն Սիմոնյանը հայտնեց, որ Կենտրոնական ընտրական հանձնաժողովը ներկայացրել է ԱԺ պատգամավոր ընտրված և լիազորությունները վաղաժամ դադարած պատգամավորների մանդատները հաջորդ թեկնածուներին տրամադրելու մասին արձանագրությունները, ըստ որոնց՝ մանդատները տրվում են «Հայաստան» կուսակցությունների դաշինքի հաջորդ թեկնածուներ Մհեր Սահակյանին, Արփինե Վարդանյանին, Արման Ղազարյանին և Իրինա Գասպարյանին։
Նոր պատգամավորները երդմամբ ստանձնեցին պարտականությունները։
2021 թ․-ի խորհրդարանական արտահերթ ընտրություններում «Հայաստան» դաշինքի մաս էր կազմում «Վերածնվող Հայաստան» կուսակցությունը։ Այդ կուսակցությունից ընտրված 3 պատգամավորներ՝ Վահե Հակոբյանը, Հռիփսիմե Ստամբուլյանն ու Ելենա Կիրակոսյանը վերջերս հայտարարել էին, որ հրաժարվում են պատգամավորական մանդատներից։Մանդատից հրաժարվել էր նաև «Հայաստան» խմբակցության պատգամավոր Արամ Վարդևանյանը։
