azatutyun.am: «Եվս մեկ անգամ ցանկանում եմ դիմել Թուրքիայի իշխանություններին և ժողովրդին՝ օգնեք Ուկրաինային», – Անկարայում կայացած ճեպազրույցում հայտարարել է Թուրքիայում Ուկրաինայի դեսպան Վասիլ Բոդնարը։
«Մենք կոչ ենք անում փակել օդային տարածքը և Բոսֆորի ու Դարդանելի նեղուցները։ Մեր պահանջները փոխանցել ենք թուրքական կողմին։ Միաժամանակ ցանկանում ենք պատժամիջոցներ սահմանել Ռուսաստանի հանդեպ», – ասել է Բոդնարը։
1936 թվականի պայմանագրի համաձայն՝ Թուրքիան պատերազմի կամ սպառնալիքի դեպքում կարող է սահմանափակել նեղուցներով նավագնացությունը։
ՆԱՏՕ-ի անդամ Թուրքիայի նախագահ Ռեջեփ Էրդողանն անընդունելի է համարել Ուկրաինայի հանդեպ Ռուսաստանի գործողությունները, բայց ավելի վաղ դեմ էր արտահայտվել պատժամիջոցներին՝ փորձելով լավ հարաբերություններ պահպանել թե՛ Ռուսաստանի, թե՛ Ուկրաինայի հետ։
