Նոր տիպի կորոնավիրուսի տարածումը կանխելու նպատակով հայտարարված արտակարգ դրության օրերին ՀՀ-ում գտնվող ՌԴ այն քաղաքացիները, ովքեր ցանկություն ունեն վերադառնալու հայրենիք, կարող են ապրիլի 3-ին Երևանից մեկնել Սոչի։ Այս մասին տեղեկացնում են ՀՀ-ում Ռուսաստանի Դաշնության դեսպանությունից։
«Հայաստանում ՌԴ դեսպանատունն իր քաղաքացիներին խորհուրդ է տալիս օգտվել «Ուրալյան ավիաուղիներ»-ի Երևան-Սոչի չվերթից, որը լինելու է ապրիլի 3-ին: Չվերթի համարն է SVR2762, իսկ տոմսերն արդեն վաճառվում են ավիաընկերության www.uralairlines.ru կայքում: Դեսպանատունը խորհուրդ է տալիս քաղաքացիներին վերադառնալ ՌԴ և օգտվել այս հնարավորությունից, անկախ նրանից, թե որ քաղաքում են ապրում, որովհետև այս պահին այլ չվերթեր չեն ծրագրվում»,- նշված է դեսպանության «Ֆեյսբուք»-ի էջում:
Ռուսաստանի Դաշնության գլխավոր սանիտարական բժշկի մարտի 30-ի որոշման համաձայն` Ռուսաստան վերադարձած բոլոր անձինք ժամանման պահից սկսած` 14 օրով մեկուսացվելու են և կլինեն բժշկական հսկողության տակ։
