ԱՄՆ նախագահ Ջո Բայդենը հայտարարել է, որ Ռուսաստանի մեղադրանքները, թե Կիևը կենսաբանական և քիմիական զենք ունի, ցույց են տալիս, որ Վլադիմիր Պուտինն ինքն է մտածում դրանք օգտագործելու մասին։ Այս մասին հայտնում է «Reuters»-ը։
Բայդենի խոսքով՝ Պուտինը հայտնվել է փակուղում և կեղծ պնդումներ է անում, որ Ամերիկայում կենսաբանական զենք կա, իսկ Եվրոպայում՝ քիմիական, սակայն այդ պնդումները ճիշտ չեն։
«Նրանք (ռուսները- խմբ․) նաև ասում են, որ Ուկրաինայում կան կենսաբանական և քիմիական զենքեր: Դա բացահայտ նշան է, որ նա (Պուտինը- խմբ․) մտածում է երկուսն էլ օգտագործելու մասին»,- ասել է ԱՄՆ նախագահը։
Հիշեցնենք՝ ռուսական կողմը հաղորդել էր, որ Ուկրաինայում «բացահայտվել է ավելի քան 30 կենսաբանական լաբորատորիաների ցանցի գործունեություն, և դրանք աշխատել են ԱՄՆ ՊՆ Սպառնալիքի կրճատման գործակալության պատվերով»։
Ավելի ուշ ՄԱԿ-ից հայտարարել էին, որ կազմակերպությանը ոչինչ հայտնի չէ Ուկրաինայում կենսաբանական զենքի որևէ ծրագրի մասին։
