Ռուսաստանում Ինստագրամ սոցցանցը ներառվել է Ռոսկոմնադզորի արգելված կայքերի ռեեստրում։ Այն ամբողջությամբ արգելափակված է, ինչի մասին են վկայում նաև GlobalCheck արգելափակումների մշտադիտարկման ծառայության տվյալները։ Սոցցանցի հասանելիությունը կազմում է 0%, գրում է Meduza-ն։
Ռուսական իշխանությունը որոշել է արգելափակել Ինստագրամը «այնպիսի տեղեկությունների տեղադրման պատճառով, որոնք Ռուսաստանի քաղաքացիների դեմ բռնության կոչեր են պարունակում», այն բանից հետո, երբ Ֆեյսբուքի, Ինստագրամի և Ուոթսափի սեփականատեր Meta-ն փոխել է մոդերացիայի իր քաղաքականությունը։ Ընկերությունը դադարել է որոշ երկրներում ջնջել ռուս զինվորականների նկատմամբ սպառնալիքներն ու բռնության կոչերն, ինչպես նաև Վլադիմիր Պուտինի և Ալեքսանդր Լուկաշենկոյին մահ ցանկանալը։
Մարտի 11-ից Ռուսաստանի գլխավոր դատախազությունը դատարան էր դիմել՝ պահանջելով Meta-ն ճանաչել՝ որպես «էքստրեմիստական կազմակերպություն»։ Քննչական կոմիտեն քրեական գործ էր հարուցել ընկերության աշխատակիցների դեմ՝ էքստրեմիստական գործունեության իրականացման կոչերի և ահաբեկչական գործունեությանը նպաստելու վերաբերյալ։
Նորա Վանյան
