«Քաղաքացու որոշում» սոցիալ-դեմոկրատական կուսակցության գործադիր մարմնի քարտուղար Սուրեն Սահակյանը ֆեսյուքյան իր էջում գրում է․
Ի պատասխան ՀՔԾ որոշումը մեկնաբանելու լրագրողների խնդրանքներին, հայտնեմ, որ մենք, ցավոք, դեռևս չենք ստացել ՀՀ գլխավոր դատախազին, ԱԺ նախագահին, ԱԺ երեք խմբակցություններին հղված մեր դիմումների պաշտոնական պատասխանները։ Միայն այդ պատասխանները ստանալու և դրանք վերլուծելու դեպքում հնարավոր կլինի պատկերացում կազմել, թե հարցը, ի վերջո, որ ուղղությամբ կշարժվի։
Բայց ուզում եմ վստահեցնել, որ այսպիսի պատասխանը ամենահավանականն էր ու այն միայն գործընթացի սկիզբն է ազդարարում, ոչ թե ավարտը։ Սա մի գործընթաց է, որն անկախ կողմերի կամքից հանգեցնելու է լայն շրջանակի օրենսդրական փոփոխությունների, որոնք, հուսանք, առհավետ կլուծեն բիզնեսի և պետական կառավարման համակարգի տարանջատման խնդիրը։ «Քաղաքացու որոշում» կուսակցության արձագանքի համար, հավանաբար, կընտրվի դրա համար ամենահարմար՝ ասուլիսի տարբերակը։ Այն տեղի կունենա պատասխանները ստանալուց հետո առավելագույնը՝ երկրորդ օրը։
