Հոկտեմբերի 7-ին հզոր երկրաշարժ է գրանցվել Ճապոնիայի մայրաքաղաք Տոկիոյի մոտակայքում։ Ուժգնությունը կազմել է 6․1 մագնիտուդ, հայտնում է ТАСС-ը։
Ստորգետնյա ցնցումների էպիկենտրոնը գտնվել է Տոկիոյի և Չիբա պրեֆեկտուրաների սահմանին: Ցնցումների օջախը գտնվել է 80 կմ խորության վրա:
Ցնցումների հետևանքով Ճապոնիայի մայրաքաղաքի փողոցներում գործարկվել է արտակարգ իրավիճակների նախազգուշացման համակարգը։ Համացանցում հայտնված տեսանյութերից երևում է, թե ինչպես են ճոճվում շենքերի պատերը։
Երկրաշարժից հետո Ճապոնիայում ցունամիի սպառնալիք չկա, սակայն սեյսմոլոգները նախազգուշացնում են նոր հզոր հետցնցումների հավանականության մասին:
