1lurer.am: ՀՀ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանն իր ելույթում անդրադարձավ ԱԺ նախագահի տեղակալի ընդդիմադիր թեկնածուի ընտրության կարգին և այն պատճառներին, թե ինչու Իշխան Սաղաթելյանը չընտրվեց ԱԺ նախագահի տեղակալ:
«Մենք ապահովել ենք նվազագույն անհրաժեշտ ձայների քանակը, որպեսզի պարոն Սաղաթելյանն ընտրվեր: Ի՞նչ ենք հաշվի առել «նվազագույն շեմ» ասելով: Քանի որ պարոն Սաղաթելյանը երկու ընդդիմադիր խմբակցությունների միասնական թեկնածուն էր, նշանակում է, որ երկու ընդդիմադիր խմբակցություններից պիտի քվեարկությանը մասնակցեր 34 պատգամավոր, «Հայաստան» դաշինքի 2 ներկայացուցիչ գտնվում է կալանքի տակ: Մենք նախատեսել էինք ապահովել ձայների այնպիսի բաշխվածություն, որ լրացվեր բացը, և պարոն Սաղաթելյանն ընտրվեր, սակայն ընդդիմության 34 պատգամավորներից մեկն այսօր չմասնակցեց միասնական թեկնածուի քվեարկությանը»,- ասաց Կոնջորյանը:
Կոնջորյանը նշեց, որ իրենք նախապես գիտեին այդ մեկ պատգամավորի բացակայության մասին:
«Հաշվի առնելով նաև այդ հանգամանքը՝ մենք մեր ձայների նվազագույն շեմում նաև դա էինք հաշվի առել և ավելացրել էինք քվեարկողների թիվն այնքանով, որ անհրաժեշտ քանակի ձայները պարոն Սաղաթելյանը ստանա: Եթե ամեն ինչ գնար իմ ներկայացրած սցենարով, ապա պիտի պարոն Սաղաթելյանը ստանար 55 կողմ ձայն: Պարոն Սաղաթելյանը ստացել է 53 կողմ, 50 դեմ և 1 անվավեր: Մնացած հետևությունները ես առաջարկում եմ, որպեսզի անեք դուք»,- ասաց Կոնջորյանը:
Կոնջորյանը հայտնեց, որ իշխող խմբակցությունը վերահաստատում է իր դիրքորոշումը, միաժամանակ ընդդիմությանը խնդրում ապահովել իրենց ձայները:
