lragir.am: Ազգային ժողովը քննարկում է «Իմ քայլը» խմբակցության հեղինակած Աշխատանքային օրենսգրքում փոփոխություններ և լրացումներ կատարելու մասին օրենքի նախագիծը։
Հիմնական զեկուցող պատգամավոր Հերիքնազ Տիգրանյանն ասաց, որ 2005 թվականից ուժի մեջ մտած Աշխատանքային օրենսգիրքը որոշակի ծավալով է կարգավորում զինվորական ծառայության հետ կապված հարաբերությունները։ Այս նախագիծը միտված է զինվորական ծառայության բոլոր տեսակների հետ կապված հարաբերությունները կարգավորելուն։ Այսօրվա գործող Աշխատանքային օրենսգիրքը հստակ կարգավորում է պարտադիր ժամկետային զինվորական ծառայության հետ կապված հարաբերությունները՝ սահմանելով, որ գործատուն աշխատանքային պայմանագիրը լուծում է։ Մնացած դեպքերում, եթե խոսքը վերաբերում է պահեստազորային կամ զորահավաքային զինծառայությանը, որն իր մեջ ներառում է նաև վարժական հավաքները, զորավարժությունները և զորահավաքային զինծառայությունը, այս դեպքերում կարգավորումները գրեթե բացակայում են։ Եվ գործատուն չունի հստակ ձևակերպումներ՝ ինչպես պետք է վարվի աշխատողի աշխատանքային հարաբերությունները կարգավորելիս։
«Մեր նախագծով առաջարկվում է ամբողջականացնել Աշխատանքային օրենսգրքի 124 հոդվածը՝ աշխատանքային հարաբերությունները կապված զինվորական ծառայության հետ և դրանում ներառել զինվորական ծառայության բոլոր տեսակների դեպքում որոշակի իրավունքներ և պարտականություններ գործատուի համար։
Մասնավորապես, հաշվի առնելով այն հանգամանքը, որ ռազմական դրություն հայտարարելու կառավարության որոշմամբ միաժամանակ սահմանվել է նաև զորակոչ, առաջարկվում է, որ զորակոչի միջոցով զինվորական ծառայություն իրականացնելու ընթացքում աշխատողի աշխատատեղը գործատուի մոտ պահպանվում է։ Այդ ժամանակահատվածի համար աշխատողն ազատվում է աշխատանքային պարտականությունների կատարումից։
Եվ սահմանվում է նաև, որ գործատուի և աշխատողի միջև աշխատանքի վարձատրության հարաբերությունները կարող են կարգավորվել կողմերի համաձայնությամբ»,- ասաց Տիգրանյանը։
Նաև առաջարկվում է, որ զորահավաք իրականացնելիս կամ կամավորագրվելու դեպքում այդ ժամանակահատվածը հաշվարկվի որպես աշխատանքային ստաժի հատված։
