azatutyun.am: Եվրամիությունը չի ճանաչում Ալեքսանդր Լուկաշենկոյին՝ որպես Բելառուսի լեգիտիմ նախագահի, և ավարտում է նրա ռեժիմի ներկայացուցիչների դեմ պատժամիջոցների նախապատրաստումը: Այս մասին երեկ Եվրախորհրդարանի նստաշրջանում հայտարարել է Եվրամիության արտաքին հարաբերությունների գծով բարձր ներկայացուցիչ Ժոզեպ Բորելը:
«Մենք կարծում ենք, որ օգոստոսի 9-ի ընտրությունները կեղծվել են, և մենք չենք ճանաչում Լուկաշենկոյին որպես Բելառուսի լեգիտիմ նախագահ», – ասել է Բորելը՝ հավելելով, որ Եվրամիությունը պատրաստվում է պատժամիջոցներ կիրառել Բելառուսում «բռնության, բռնաճնշումների, ընտրությունների արդյունքների կեղծման համար պատասխանատու մեծ թվով մարդկանց նկատմամբ»:
Ժոզեպ Բորելը հույս է հայտնել, որ պատժամիջոցները կհամաձայնեցվեն միչև սեպտեմբերի 24-25-ը կայանալիք Եվրոպական խորհրդի նիստը: Որոշումը պետք է ընդունվի Բրյուսելում առաջիկա երկուշաբթի օրը՝ ԵՄ արտգործնախարարների հանդիպմանը: Եվրամիության դիվանագիտության ղեկավարի խոսքով՝ լրացուցիչ պատժամիջոցներ կարող են դիտարկվել, եթե իրավիճակը Բելառուսում «շարունակի վատթարանալ»:
Բորելը կոչ է արել Բելառուսի իշխանություններին «վերջ տալ բռնություններին, անօրինական ձերբակալություններին» և սկսել «ազգային երկխոսություն»: Եվրամիությունը պատրաստ է աջակցել երկխոսության ցանկացած վստահելի նախաձեռնության, վստահեցրել է նա:
Ըստ Ժոզեպ Բորելի՝ Բելառուսում քաղաքական ճգնաժամից լավագույն ելքը կլինի ԵԱՀԿ դիտորդների վերահսկողության ներքո նոր նախագահական ընտրությունների անցկացումը: Սակայն եվրոպական դիվանագիտության ղեկավարն ափսոսանք է հայտնել, որ մինչ այժմ Բրյուսելը չի կարողացել խոսել Բելառուսի իշխանությունների հետ:
