12։40- ԱԺ-ն քննարկեց կորոնավիրուսի տարածումը կանխելու, համաճարակի հետևանքների մեղմման կամ վերացման ուղղությամբ ՀՀ կառավարության և պարետատան իրականացրած միջոցառումների արդյունավետությունը, ինչպես նաև արտակարգ դրության ժամանակահատվածում մարդու իրավունքների, հիմնարար ազատությունների սահմանափակումների արդյունավետությունը և իրավաչափությունը ուսումնասիրող ԱԺ քննիչ հանձնաժողովի անդամների թիվը սահմանելու մասին որոշումը: Նախաձեռնողները առաջարկում են, որ քննիչ հանձնաժողովը ունենա 12 անդամ՝ 7 անդամ «Իմ քայլից», 3 անդամ «Բարգավաճ Հայաստան»-ից , 2-ը՝«Լուսավոր Հայաստան»-ից։ |tert.am|
12։10- Մամուլում շրջանառվում է տեղեկություն, թե Արսեն Թորոսյանն աբսուրդային հրաման է արձակել, և հրամայված է բոլոր բուհերին ու միջին մասնագիտական հաստատություներին ազատվել 65 և ավել տարիք ունեցող բոլոր դասախոսներից։ Նախ նշվածը ոչ թե հրաման է, այլ հրամանի նախագիծ, որը քննարկումների և լրաշմակումների փուլում է։ Այն ոչ թե աբսուրդային է, այլ օրվա հրամայական․ բոլոր փաստաթղթերում նշվել է, որ անհրաժեշտ է ձեռնպահ մնալ կորոնավիրուսի ծանր հիվանդության զարգացման բարձր ռիսկային խմբի աշխատողներին աշխատավայր կանչելուց։ [ԱՆ]
12։05- ՀՀ բուհերում ուսումնառելու նպատակով 2020-2021 ուսումնական տարվա համար ԿԳՄՍՆ են դիմել 670 սփյուռքահայեր 29 երկրից, որոնցից շուրջ 210-ը՝ Վրաստանի քաղաքացիներ: ԿԳՄՍՆ-ն իրականացրել է աշխատանքներ՝ ապահովելու Վրաստանի ազգությամբ հայ քաղաքացիների մուտքը ՀՀ տարածք՝ առանց 14-օրյա ինքնամեկուսացման պայմանի կիրառման: [ԿԳՄՍՆ]
11։35- ԱՀ-ում նոր կորոնավիրուսային վարակի 3 նոր դեպք է հաստատվել: Առողջացել է 4 քաղաքացի: Առայսօր, COVID-19-ը ախտորոշվել է 340 մարդու մոտ, որից 300-ը հաղթահարել է հիվանդությունը: Փաստացի բուժում է ստանում 38, ընդհանուր մեկուսացված է 79 քաղաքացի: [Արցախ/տեղեկատվական շտաբ]
11։00- Մահվան դեպքի վերաբերյալ հայտնում ենք, որ պացիենտը եղել է 65 տարեկան տղամարդ և ունեցել է ուղեկցող քրոնիկական հիվանդություններ։ [ՀՀ ԱՆ]
10։55- Սեպտեմբերի 15-ի դրությամբ հաստատվել է կորոնավիրուսային հիվանդության ընդհանուր 46119 դեպք, որոնցից 41941-ն` առողջացած, 920-ը` մահվան ելքով: Այսպիսով` երեկ կատարվել է 2761 թեստավորում, հաստատվել է կորոնավիրուսային հիվանդության 150 նոր դեպք: Ունենք 248 առողջացած, մահվան 1 նոր դեպք։ Հաստատված նոր դեպքերը կազմել են իրականացած թեստերի 5.4%-ը։ [ՀՀ ԱՆ]
Կորոնավիրուսի շուրջ զարգացումներ, Հայաստան, 16․09․20
