ՀՀ վերաքննիչ վարչական դատարանը վարույթ է ընդունել «Լուսավոր Հայաստան» կուսակցության պատգավորական մանդատը վերկանգնելու հարցով վերաքննիչ բողոքը։ «Ֆեյսբուք»-ի իր էջում այս մասին գրել է ՀՀ ԱԺ «Լուսավոր Հայաստան» խմբակցության ղեկավար Էդմոն Մարուքյանը։
ՀՀ ԱԺ «Լուսավոր Հայաստան» խմբակցության ղեկավար՝ խմբակցության անունից հունիսի 22-ին դիմել էր ՀՀ կենտրոնական ընտրական հանձնաժողով՝ խնդրելով սահմանված ընթացակարգով «Լուսավոր Հայաստան» կուսակցության նախընտրական ցուցակի հաջորդ համարին տրամադրել պատգամավորական մանդատ՝ վերականգնելու համար խորհրդարանի իշխանական և ընդդիմադիր խմբակցությունների՝ սահմանադրական օրենքով նախատեսված հարաբերակցությունը։
Հանձնաժողովը հուլիսի 8-ին որոշմամբ մերժել էր վերոնշյալ դիմումը՝ եզրափակիչ մասում նշելով, որ իր որոշումը կարող է բողոքարկվել ՀՀ վարչական դատարան։
«Ստանալով վերոնշյալ մերժումը՝ «Լուսավոր Հայաստան» խմբակցությունն այն սահմանված կարգով և ժամկետում բողոքարկել է վարչական դատարան։
Դատարանը հուլիսի 22-ին մերժել է հայցադիմումի ընդունումը՝ պատճառաբանելով, որ ԱԺ խմբակցությունը վարչական դատարան դիմող սուբյեկտ չի կարող համարվել։
«Վարչական դատարանի նշված որոշումը հուլիսի 31-ին մեր կողմից բողոքարկվել էր վերաքննության կարգով»,- գրել է Մարուքյանը։
«Լուսավոր Հայաստան» խմբակցության ղեկավարը խոստացավ, որ գործի հետագա ընթացքի մասին կտեղեկացի համապատասխան ակտերն ստանալուց հետո։
