tert.am: Հյուսիսային Կորեայի իշխանությունները հայտնել են երկրում կորոնավիրուսով վարակման կասկածելի առաջին դեպքի մասին, ТАСС-ի փոխանցմամբ՝ հաղորդում է Կորեայի կենտրոնական հեռագրային գործակալությունը:
Ըստ այդմ, կորոնավիրուսով վարակված լինելու կասկած կա հուլիսի 19-ին Հարավային Կորեայից վերադարձած մի քաղաքացու վերաբերյալ, որի մոտ կորոնավիրուսային հիվանդության բնորոշ ախտանշաններ են դրսևորվել:
Ստեղծված իրավիճակը քննարկելու նպատակով երկրի ղեկավար Կիմ Չեն Ընը Կորեայի Կոմկուսի արտահերթ նիստ է հրավիրել՝ հայտարարելով վարակի տարածման դեպ պայքարելու համար բարձր պատրաստվածություն ապահովելու անհրաժեշտության մասին:
Ըստ Հյուսիսային Կորեայի պաշտոնական տվյալների՝ մինչ այժմ երկրում կորոնավիրուսով վարակման որևէ դեպք չի գրանցվել: Հունվարի վերջից երկրում վարակի տարածումը կանխելու նպատակով սահմանափակումներ էին մտցվել՝ սահմանների փակվելուց մինչև դպրոցների աշխատանքի դադարեցում և համազգային կարանտինի հայտարարում:
