tert.am: Ստամբուլի պետական դատախազությունը իր կազմած մեղադրական եզրակացության մեջ պոլսահայ լրագրող, «Ակօս» թերթի հիմնադիր և նախկին խմբագիր Հրանտ Դինքի անվան հիմնադրամին և Հրանտ Դինքի կնոջը` Ռաքել Դինքին, մայիսի վերջին սպառնալից նամակներ ուղարկած անձանցից Հուսեյն Աթեշի համար պահանջել է մինչև 26 տարի 3 ամիս ազատազրկում, իսկ Էրսին Բաշքանի համար` 8 տարի 9 ամիս ազատազրկում: Այս մասին տեղեկացնում է tr.sputniknews.com կայքը:
Օրերս «Հրանտ Դինք» հիմնադրամի փաստաբան Ֆեթհիյե Չեթինը հայտնել էր, որ Դինքի կնոջը և իրեն ուղղված նամակներում իրենց մահվամբ են սպառնացել:
Գործը քննվել է Ստամբուլի պետական դատախազությունում, մեղադրանք է առաջադրվել «անանուն սպառնալից նամակ ուղարկելու» համար:
Նամակները Հուսեյն Աթեշի կողմից էլեկտրոնային փոստով ուղարկվել էին մայիսի 27-28-ին, մայիսի 30-ին էլ երկրորդ նամակն ուղարկվել էր Էրսին Բաշքանի կողմից:
Հրանտ Դինքի անվան հիմնադրամը հիմնվել է 2007թ.-ին Դինք ընտանիքի կողմից, հիմնադրամի նպատակն է նպաստել թուրք և հայ հասարակությունների միջև երկխոսությանն ու Հայաստան-Թուրքիա-Եվրոպա մշակութային փոխգործակցությանը:
Հրանտ Դինքը սպանվել է 2007թ.-ի հունվարի 19-ին` Ստամբուլի Շիշլի թաղամասում գտնվող «Ակօս» թերթի խմբագրատան առջև` 16-ամյա թուրք ազգայնական Օգյուն Սամասթի կրակոցից:
