azatutyun.am: Թուրքիայի դատարանը մոտ 10 տարվա ազատազրկման է դատապարտել ընդդիմության հայտնի առաջնորդներից մեկին՝ Ջանան Քաֆթանչիօղլուին՝ սոցիալական ցանցերում ահաբեկչություն քարոզելու, կառավարության ու նախագահ Էրդողանի հասցեին վիրավորական գրառումներ անելու անելու համար:
Դատարանի առջև հավաքված աջակիցները բողոքի ցույցով են ընդունել դատավճիռը։ Ինքը՝ տիկին Քաֆթանչիօղլուն, պնդել է՝ իշխանությունն այս քայլերով չի կարող իրեն լռեցնել:
«Մեր երկրում քրեական գործերը հարուցվում ու քննվում են ոչ թե դատարաններում, այլ՝ նախագահական նստավայրում», – պնդել է ընդդիմադիր գործիչը: «Ուս-ուսի տված՝ պայքարենք ֆաշիզմի դեմ», – արձագանքել են ցուցարարները:
Քաֆթանչիօղլուն Ժողովրդահանրապետական կուսակցության առաջամարտիկներից է, ում աջակցությամբ էլ ընդդիմությունը ամիսներ առաջ պարտության մատնեց նախագահ Էրդողանի թեկնածուին Ստամբուլի քաղաքապետի ընտրություններում:
Վերջինս պնդել է, որ բողոքարկելու է դատարանի «քաղաքական վճիռը», ինչը նշանակում է, որ մինչև վերջնական որոշումը Քաֆթանչիօղլուն կմնա ազատության մեջ:
