Գյումրու համայնքապետի ՀԿԿ թեկնածու Վարդան Ղուկասյանը հայտնում է, որ սպասում են երրորդ ընդդմիադիր ուժի՝ «Մեր քաղաքը» կուսակցությունների դաշինքի հայտարարությանը: Ղուկասյանը նշում է, որ պատրաստ են ընդդիմադիր ուժերի հետ քննարկումների ծրագրային առումներով:
Ղուկասյանը, ի պատասխան հարցին, թե պատրա՞ստ է ինչ-որ պաշտոնների նշանակել այն ուժերի ներկայացուցիչներին, որոնք կմիանան իրեն, ասաց՝ բացի փոխքաղաքապետի պաշտոնից՝ մյուս բոլոր պաշտոններում պատրաստ են նշանակել այլ ուժերի ներկայացուցիչներ:
Վարդան Ղուկասյանը հայտարարեց՝ ընդդիմության միավորվելու պարագայում պատրաստ են տալ այն պաշտոնը, որ պետք է, բացի փոխքաղաքապետի պաշտոնից։
Լրագրողների հարցին ի պատասխան, թե ինչու չեն զիջի փոխքաղաքապետի պաշտոնը, Ղուկասյանն ասաց․ «Պատկերացրեք, որ եթե ինձ ձերբակալեն, ինքըստինքյան փոխքաղաքապետը պարտավորությունները վերցնում է իր վրա, և ինքը դառնում է քաղաքապետ։ Թե չէ մենք խնդիր չունենք աշխատելու հետ»։
Նշենք, որ «Մեր քաղաքը» կուսակցությունների դաշինքը, որը քվեարկությամբ երրորդ ուժն է, դեռևս ոչ մի հայտարարություն չի տարածել արդյունքների վերաբերյալ: Ընդդիմադիր 3 ուժերի մանդատների քանակն այս պահին չի բավարարում համայնքապետ ընտրելու համար:
