armenpress.am: Մեքսիկայի կառավարությունը Ազգային գվարդիայի լրացուցիչ 10 հազար զինծառայողի կուղարկի երկրի հյուսիսային սահման՝ թմրանյութերի ապօրինի շրջանառության դեմ պայքարելու նպատակով: «Արմենպրես»-ի հաղորդմամբ՝ ԱՄՆ-ի նախագահ Դոնալդ Թրամփի հետ բանակցություններից հետո այս մասին հայտարարել է Մեքսիկայի նախագահ Կլաուդիա Շեյնբաումը։
«Մեքսիկան Ազգային գվարդիայի 10000 զինծառայողներով անհապաղ կամրապնդի իր հյուսիսային սահմանը՝ կանխելու Մեքսիկայից Միացյալ Նահանգներ թմրանյութերի, մասնավորապես, ֆենտանիլի անօրինական շրջանառությունը»,- գրել է նա Х ցանցի իր բլոգում:
Մեքսիկայի նախագահը նաև նշել է, որ Վաշինգտոնն իր հերթին պարտավորվել է ուժեղացնել դեպի Մեքսիկա զենքի մաքսանենգությունը կանխելու աշխատանքները: Կլաուդիա Շեյնբաումը հավելել է, որ փետրվարի 3-ից սկսած ԱՄՆ-ի և Մեքսիկայի կառավարությունների թիմերը սկսելու են աշխատել անվտանգության և առևտրի ուղղություններով:
Փետրվարի 3-ին Թրամփի հետ Շեյնբաումի միջև բանակցությունների արդյունքում որոշվել է մեկ ամսով կասեցնել մաքսատուրքերի կիրառումը Մեքսիկայից ԱՄՆ ներմուծվող ապրանքների նկատմամբ:
