Այսօր Կառավարության շենքի դիմաց կրկին բողոքի ակցիա են իրականացրել փոքր և միջին ձեռնարկատերերը։
Նրանք բողոքում են ինչպես հունվարի 1-ից շրջանառության հարկը 5-ից մոտ 10 տոկոսի բարձրացնելու դեմ, այնպես էլ համընդհանուր հայտարարագրման, աղբահանության, տրանսպորտի գների փոփոխության դեմ։
«Այսօրվա դրությամբ ամեն ինչ այս կառավարությունն անում է, որ փակվի փոքր և միջին բիզնեսը, ու դա նրան հաջողվում է», – նշեց ակցիայի մասնակիցներից մեկը:
Մասնակիցները նշում են, որ հարկային բեռի ավելացումը վնասելու է ոչ միայն գործարարներին, այլ նաև հասարակությանը, քանի որ տնտեսվարողները ստիպված ապրանքների գները բարձրացնելու են, և հետևաբար նվազելու են վաճառքները։
Ակցիայի մասնակիցները կոչ արեցին ՀՀ բոլոր բնակավայրերից հինգշաբթի օրը հավաքվել Հանրապետության հրապարակում՝ իրենց բողոքն արտահայտելու։
