«Ես, բնավ, կոռեկտ չեմ համարում քննարկել այդ բարեկամական կապը»,- խոսելով Յուրա Իվանյանի և բնապահպանության նախկին նախարար Արամայիս Գրիգորյանի բարեկամական կապի մասին՝ ասաց ԱԺ Բարգավաճ Հայաստան խմբակցության պատգամավոր Արման Աբովյանը։
Իր խոսքում Աբովյանը նշեց, որ մեծ հաշվով մեկնաբանելու ոչինչ չկա՝ Հայաստանում ամեն ինչ պետք է լինի օրենքի սահմաններում, եթե կա օրենքի խախտում՝ պետք է համապատասխան եզրակացություններ անել։
Այն հարցին, թե արդյո՞ք բարեկամական կապի առկայության դեպքում չի խախտվել գործի անաչառությունն, Աբովյանն ասաց․
«Գիտեք, ինքը շատ նուրբ սուբստանց է, մենք պետք է հիմնվենք այն հարցի վրա, որ ՀՀ-ում տեղի ունեցող յուրաքանչուր քայլ համաատասխանի ՀՀ կարգավորումներին։ Կոպիտ ասած, բոլոր քայլերը պետք է լինեն օրենքի սահմաններում»։
Անդրադառնալով ԷԼԱՐԴ ընկերության հետ քննարկմանը, Աբովյանն ասաց, որ ի սկզբնե, որոշակիորեն պարզ էր, որ լրացուցիչ հետազոտությունների կամ գործողությունների անհրաժեշտություն կլինի։
«Ես միայն կարող եմ ասել մեր դիրքորոշումը, որը հետևյալն է՝ յուրաքանչյուր հարց, որը հուզում է հանրությանը և ունի բավականին լայն հանրային ընկալում և արձագանք, ապա այն պետք է հանգուցալուծվի միայն ու միայն հանրային կոնսեսուսի արդյունքում » ,- հավելեց պատգամավորը։
Հարցին, թե արդյո՞ք քննարկումից կարելի է կանխատեսել, թե ղեկը որ ուղղությամբ կշրջվի, Աբովյանն պատասխանեց, որ զերծ է մնում կանխատեսումներից։
«Հնարավոր է, որ նոր գործընթացներ լինեն, բայց ինչ էլ որ լինի հիմնական նպատակը պետք է լինի հանրային կոնսեսուսի ձևավորումը»,-եզրափակեց Արման Աբովյանը։
