Քաղաքացիները Բագրատ Սրբազանի կոչով այսօր ժամը 15:30-ից հավաքվել են մայրաքաղաքի չորս կետերում և այս պահին շարժվում են դեպի Օպերա, իրենց խոսքով խաղաղ անհամաձայնություն հայտնելու։ Այս պահին Օպերայի շենքի հարակից ողջ տարածքը շրջափակված է ոստիկանական ուժերով և երկաթե արգելապատնեշներով։
Մասնավորապես տասնյակ քաղաքացիներ են հավաքվել Սարյանի անվան այգում, Կոնսերվատորիայի դիմացի այգում, Սուրբ Աննա եկեղեցու բակում, Հյուսիսային պողոտայում։
Բագրատ Սրբազանը լրագրողներին հայտնեց, որ առավոտից հանդիպումներ է ունեցել «Հայաքվե» նախաձեռնության, «Ապրելու երկիր» կուսակցութան անդամների, Եզդիական համայնքի ներկայացուցիչների հետ, բժիշկների հետ, քաղաքագետ Սուրեն Սուրենյանցի հետ։
Նա նաև շնորհակալություն հայտնեց ոստիկաններին, որ անսացել են իր կոչին, դուրս են եկել և անհամաձայնություն հայտնող քաղաքացիների փոխարեն փակել են փողոցները։
Հիշեցնենք, որ ժամը 16:00-ին Ա. Սպենդիարյանի անվան օպերայի և բալետի ազգային ակադեմիական թատրոնում EBRD միջազգային ֆորումի շրջանակներում կայանալու է միջոցառում, որին մասնակցելու է Նիկոլ Փաշինյանը:
Ավելի վաղ ՆԳՆ ոստիկանությունից հայտնել էին, որ ժամը 15:00-20:00-ն, Երևանում կայանալիք ՎԶԵԲ միջազգային ֆորումի շրջանակներում ժամանակավորապես փակ են լինելու Տերյան փողոցը՝ Սայաթ-Նովայի պողոտա-Տերյան փողոց խաչմերուկից մինչև Տերյան-Թումանյան փողոցների խաչմերուկ, Թումանյան փողոցը՝ Թումանյան-Աբովյան փողոցների խաչմերուկից մինչև Մաշտոցի պողոտա-Թումանյան փողոց խաչմերուկ։
Օպերային հարակից սրճարանները «Ինֆոքոմ»-ի թղթակցի փոխանցմամբ կիսադատարկ էին։ «Ատլանտիկ» սրճարանի աշխատակիցը «Ինֆոքոմ»-ի հետ զրույցում հաղորդեց, որ ոստիկանները հրահանգել են այցելուներին դուրս հանել և մինչև երեկոյան ժամը 19։00-ն հյուրեր չընդունել։ Իսկ «Մեղեդի» սրճարանի աշխատակիցն ասաց, որ սրճարանից նույնիսկ բռնի ուժով են հեռացրել մարդկանց, որոնք չէին ցանկանում դուրս գալ։
