Հայ-թուրքական սահմանին գտնվող Մարգարայի անցակետի սպասարկումը սկսելու համար քաղաքական որոշում պետք է կայացվի։ Կառավարության նիստից հետո լրագրողների հետ զրույցում այս ասաց ՀՀ պետական եկամուտների կոմիտեի նախագահ Ռուստամ Բադասյանը։
«Մարգարայի անցակետը պատրաստ է սպասարկելու երրորդ երկրների քաղաքացիներին և դիվանագիտական անձնագիր ունեցող անձանց։ Արդեն վաղուց պատրաստ է»,- ասաց նա։
Հարցին՝ երբվանից է սպասարկելու, Բադասյանն ասաց, որ չգիտի․ «քաղաքական որոշում պետք է կայացվի»։
Բադասյանի խոսքով նախնական պայմանավորվածություն է եղել, դրա շրջանակում էլ Հայաստանն աշխատանքներ է իրականացրել, և երբ քաղաքական որոշում կլինի, սպասարկումը կիրականացվի։
ՊԵԿ նախագահը նաև նշեց, որ տեղեկություն չունի` թուրքական կողմը որևէ աշխատանք կատարում է, թե ոչ․ գուցե այն կողմում լրացուցիչ աշխատանքներ իրականացնելու կարիք չկա։
