tert.am: Արդարադատության միջազգային դատարանը մասնակիորեն բավարարել է Իրանի հայցն ընդդեմ ԱՄՆ-ի՝ երկրի օտարերկրյա ակտիվների սառեցման հարցի վերաբերյալ։ Այժմ Վաշինգտոնը պետք է փոխհատուցում վճարի Թեհրանին։ Այս մասին հայտնում է ՄԱԿ-ի մամուլի ծառայությունը։
Դատարանը կարծում է, որ Միացյալ Նահանգները, սառեցնելով Իրանի օտարերկրյա ակտիվները, խախտել է երկրների միջև 1955 թվականի բարեկամության պայմանագրով ստանձնած պարտավորությունները։
Արդարադատության միջազգային դատարանի դատավորները վճիռ են կայացրել այս գործով և համաձայնել Իրանի այն փաստարկների հետ, որ ԱՄՆ-ն խախտել է այս երկու պետությունների միջև Բարեկամության, տնտեսական հարաբերությունների և հյուպատոսական իրավունքների պայմանագրի մի շարք կետերով նախատեսված իր պարտավորությունները։
«Դատարանը գտնում է, որ ԱՄՆ-ն պարտավոր է փոխհատուցում վճարել Իրանի Իսլամական Հանրապետությանը միջազգային պարտավորությունների խախտման հետևանքների համար…»,- ասված է ՄԱԿ-ի դատարանի որոշման մեջ։
Դատարանը Վաշինգտոնին պարտավորեցրել է փոխհատուցում վճարել Թեհրանին՝ իրանական որոշ ընկերությունների ակտիվների սառեցման համար։ Փոխհատուցման վճարման չափը և կարգը երկրները պետք է որոշեն միմյանց միջև:Արդարադատության միջազգային դատարանը որոշել է, որ Իրանին տրվող փոխհատուցման չափի հետ կապված հարցը կողմերի պետք է լուծեն վճռի հրապարակման օրվանից 24 ամսվա ընթացքում։
Արդարադատության միջազգային դատարանի որոշումները պարտադիր են և ենթակա չեն բողոքարկման: Միևնույն ժամանակ, դատարանը չունի որևէ մեխանիզմ՝ ստիպելու երկրներին կատարել այդ որոշումները։
