Ադրբեջանը պատրաստ է Բրյուսելում եռակողմ՝ Հայաստան-Ադրբեջան-ԵՄ ձևաչափով հանդիպման։ Այս մասին հայտարարել է Հիքմեթ Հաջիևը՝ անդրադառնալով Գրանադայում հնգակողմ հանդիպման չեղարկմանը։ 

Նա նշել է, որ կողմ են նաև ուղիղ և երկկողմանի երկխոսության՝ Հայաստանի և Ադրբեջան միջև հարաբերությունների կարգավորման գործընթացի և խաղաղության պայմանագրի շուրջ։

Հաջիևի խոսքով՝ Ֆրանսիայի «կողմնակալ ու ռազմականացված քաղաքականությունը վնասում է տարածաշրջանում խաղաղությանն ու կայունությանը և վտանգի տակ դնում ԵՄ քաղաքականությունը Հարավային Կովկասում», և չնայած Բաքվի՝ հնգակողմ հանդիպմանը Թուրքիայի մասնակցությունը պնդելուն, դա թույլ չի տրվել, և այս պատճառներից ելնելով էլ Ադրբեջանը հրաժարվել է մասնակցել։

Հիշեցնենք, որ այսօր՝ հոկտեմբերի 5-ին, Իսպանիայի Գրանադա քաղաքում պետք է կայանար Հայաստանի, Ադրբեջանի, Ֆրանսիայի, Գերմանիայի, ԵՄ-ի առաջնորդների հնգակողմ հանդիպումը։ Սակայն հոկտեմբերի 4-ին հայտնի դարձավ, որ ադրբեջանական կողմը իր մասնակցությունը չեղարկել է։ Ըստ ադրբեջանական լրատվամիջոցների՝ պատճառն այն էր, որ ադրբեջանական կողմը պնդել է նաև Թուրքիայի մասնակցությունը, սակայն Ֆրանսիան և Գերմանիան առարկել են։ 

Նշենք նաև, որ երեկ՝ հոկտեմբերի 4-ին, ՀՀ վարչապետ Նիկոլ Փաշինյանը ԱԺ-ում հաստատեց հնգակողմ հանդիպումը չեղարկելու վերաբերյալ լուրերը՝ միաժամանակ հայտարարելով, որ Գրանադայում շրջադարձային նշանակության փաստաթուղթ ստորագրելու հնարավորություն կար։