Իրանի արտաքին գործերի նախարարությունը հայտարարում է, որ Հալեպում զինյալները հարձակվել են Իրանի հյուպատոսության վրա։
Երկրի ԱԳՆ-ն նշում է, որ «զինված ահաբեկչական խմբավորումների հարձակումից հյուպատոսության անձնակազմը չի տուժել»։
Հիշեցնենք, որ վերջին օրերին Սիրիայի Արաբական Հանրապետության մի շարք շրջաններում օպերատիվ իրավիճակը կտրուկ սրվել է, և ռազմական ակտիվ գործողություններ են սկսվել։
Սիրիական «Հայաթ Թահրիր աշ-Շամ» սուննի արմատական խմբավորման զինյալներն ու նրանց դաշնակիցներն արագ հարձակման ընթացքում գրավել են Հալեպ քաղաքի տարածքի առնվազն կեսը, իսկ Սիրիայի կառավարական զորքերը քաղաքը լքել են գրեթե առանց դիմադրության: Այս մասին հայտնել է Մարդու իրավունքների սիրիական դիտորդական խորհուրդը:
Սիրիական բանակն էլ հայտարարել է Հալեպից «զորքերի ժամանակավոր դուրսբերման» մասին՝ «ահաբեկիչների դեմ հակահարձակում նախապատրաստելու համար»:
