Քաղաքացիական պայմանագիր կուսակցությունը հերթական կեղծիքն է տարածում՝ պնդելով, թե իբր Հայկ Մարությանը հրաժարվել է Factor tv-ում նախընտրական բանավեճից։ Լրատվամիջոցի կողմից նախընտրական բանավեճի հրավեր, մասնակցության ձեւաչափի, ամսաթվի եւ այլ պայմանների մասին խոսակցություն չի եղել։ Այս մասին իր ֆեյսբուքյան էջում գրել է Հովսեփ Կուբատյանը։
« Factor tv-ն այսօր, ՔՊ շտաբի կեղծ հայտարարությունից հետո, այնուամենայնիվ, բանավեճ կազմակերպելու առաջարկ է արել։ Քանի որ քարոզչությանն ընդմանենը մեկ օր է մնում, եւ վերջին օրվա միջոցառումների, այդ թվում՝ մամուլի հետ շփումների գրաֆիկն արդեն նախօրոք կազմված է եղել, դրանում հապճեպ փոփոխություններ մտցնելը նպատակահարմար չենք համարում։ ՔՊ կուսակցության շտաբին մեկ անգամ եւս հորդորում ենք հրաժարվել կեղծիք եւ մանիպուլյացիա տարածելու սովորական դարձած պրակտիկայից»,- գրել է նա։
Հիշեցնենք, որ երկու կուսակցությունների արձագանքից հետո Factor ТV-ն հայտարարեց, որ սիրով երկրորդում է իր հրավերը և հրապարակավ ևս մեկ անգամ Տիգրան Ավինյանին և Հայկ Մարությանին, ինչպես նաև նրանց հետ բանավեճին մասնակցելու ցանկություն ունեցող Երևանի ավագանու ընտրություններին մասնակից քաղաքական ուժերի առաջին համարներին հրավիրում է՝ ուղիղ եթերում բանավեճի։
