tert.am: ՌԴ ԱԳ նախարար Սերգեյ Լավրովը և Իրանի արտգործնախարար Հոսեյն Ամիր Աբդոլլահիանը հեռախոսազրույց են ունեցել, որի ընթացքում քննարկել են իրավիճակը պաղեստինա-իսրայելական հակամարտության գոտում։
Ինչպես փոխանցում է ՏԱՍՍ գործակալությունը՝ հղում անելով ՌԴ ԱԳՆ հաղորդագրությանը, դիվանագիտական գերատեսչությունների ղեկավարները մտահոգություն են հայտնել Գազայի հատվածում շարունակվող առճակատման կապակցությամբ։
«Արտաքին քաղաքական գերատեսչությունների ղեկավարները մտքեր են փոխանակել պաղեստինա-իսրայելական հակամարտության գոտում առկա իրավիճակի շուրջ։ Ընդհանուր մտահոգություն է արտահայտվել Գազայի հատվածում շարունակվող զինված առճակատման վերաբերյալ։ Ընդգծվել է շուտափույթ զինադադարի հաստատման և տուժած քաղաքացիական բնակչությունը հրատապ հումանիտար օգնության տրամադրման անհրաժեշտությունը»,- ասված է ՌԴ ԱԳՆ հաղորդագրության մեջ։
