armenpress.am: Իրանի հարավ-արևելյան Սիստան և Բելուջիստան նահանգի մայրաքաղաք Զահեդանի ոստիկանական բաժանմունքի վրա հարձակման հետևանքով երկու ոստիկան է սպանվել:
Այս մասին հայտնում է IRNA-ն՝ վկայակոչելով Իսլամական հեղափոխության պահապանների կորպուսի (ԻՀՊԿ) նահանգային բաժանմունքի հայտարարությունը:
ԻՀՊԿ-ի հայտարարության մեջ ասվում է, որ Զահեդանի ոստիկանական բաժանմունքի վրա հարձակված ահաբեկչական խմբի բոլոր չորս անդամները սպանվել են:
Նշվում է, որ զինված անձինք նռնակներ են օգտագործել ոստիկանական բաժանմունք տանող իրենց ճանապարհը բացելու համար:
Սիստան և Բելուջիստան նահանգի նահանգապետի անվտանգության հարցերով տեղակալ Ալի Ռեզա Մարհամաթին հայտնել է, որ հարձակումը սկսվել է տեղական ժամանակով 07:15-ին:
Նա նաև հայտնել է, որ հարձակվողները վնասազերծվել են մինչև ոստիկանական բաժանմունք մտնելը։
Ավելի վաղ Tasnim գործակալությունը հայտնել էր, որ հարձակվողները մահապարտների ժիլետներ են կրել, նրանցից երկուսը պայթեցրել են իրենց: Ըստ լրատվամիջոցի՝ ականատեսները հայտնել էին, որ ահաբեկիչները բարձրացել են ոստիկանական բաժանմունքի դիտաշտարակ և վերևից կրակել ոստիկանների վրա: Նշվում էր նաև, որ ոստիկանական բաժանմունքի ներսում ոստիկանական ուժերը և բազայից դուրս գտնվող անվտանգության ուժերը դաժան փոխհրաձգության ընթացքում շրջապատել են հարձակվողներին:
