Եվլախում մեկնարկել է արցախյան և ադրբեջանական կողմերի հանդիպումը։
Ադրբեջանական լրատվամիջոցները տեսանյութ էին հրապարակել՝ նշելով, որ հայկական կողմը մեկնում է Եվլախ՝ հանդիպելու ադրբեջանական կողմի հետ։ Ինչպես նախապես հայտնի էր դարձել, նրանց ուղեկցում են ռուս խաղաղապահները։
Ավելի ուշ ադրբեջանական կողմը հրապարակեց կադրեր, որոնցում երևում էր, որ արցախյան կողմից բանակցությունների մեկնել է Արցախի արտաքին հարաբերությունների մշտական հանձնաժողովի անդամ Դավիթ Մելքումյանը։
Ադրբեջանական կողմին Եվլախում ներկայացնելու է խորհրդարանական պատգամավոր Ռամին Մամեդովը, որին Ալիևը նշանակել է Ղարաբաղի տարածաշրջանի հայ բնակիչների հետ շփումների պատասխանատու։
Հիշեցնենք՝ երեկ հայտնի դարձավ, որ ռուս խաղաղապահների միջնորդությամբ պայմանավորվածություն է ձեռք բերվել ժամը 13:00-ից ռազմական գործողությունների ամբողջական դադարեցման մասին։ Ըստ հրապարակված փաստաթղթի՝ համաձայնություն է ձեռք բերվել՝
– դուրս բերել Հայաստանի Հանրապետության՝ [Արցախում] մնացած զինված ուժերը ռուս խաղաղապահ զորակազմի տեղակայման գոտուց,
– լիարժեք զինաթափել «Լեռնային ղարաբաղի պաշտպանության բանակի» զինված խմբավորումները,
– դուրս բերել ծանր տեխնիկան ու սպառազինությունը Լեռնային ղարաբաղի տարածքից՝ դրանց շուտափույթ ուտիլիզացման նպատակով:
Պայմանավորվածության համաձայն՝ ադրբեջանական կողմից առաջ քաշված հարցերը՝ ԼՂ հայերի վերաինտեգրման, իրավունքների և անվտանգության պաշտպանության, ինչպես նաև Ադրբեջանի Սահամանադրության շրջանակում ԼՂ բնակչության կենսագործունեության ապահովման վերաբերյալ, պետք է քննարկվեին տեղի հայ բնակչության և Ադրբեջանի Հանրապետության կենտրոնական իշխանության ներկայացուցիչների միջև Եվլախ քաղաքում այսօր՝ սեպտեմբերի 21-ին։
