news.am: ՀՀ վարչական դատարանում՝ նախագահությամբ դատավոր Ռոբերտ Մաքեյանի, այսօր փետրվարի 15-ին, ավարտվեց 44-օրյա պատերազմում զոհված զինծառայող Մխիթար Գալեյանի հոր՝ Գարիկ Գալեյանի գործով դատական նիստը:
Դատարանը լսելով պատասխանող կողմի առարկությունները՝ հեռացավ խորհրդակցակա սենյակ որոշում կայացնելու: Որոշումը հրապարակվելու է մարտի 7-ին:
Նշենք, որ Գարիկ Գալեյանին վարչական պատասխանատվության ենթարկելու համար դատարան է դիմել ՀՀ ոստիկանությունը: Գալեյանին պատասխանատվության ենթարկելու համար որպես հիմք ՀՀ ոստիկանությունը բերում է այն, որ նա «Եռաբլուր» զինվորական պանթեոնում չի ենթարկվել ոստիկանի օրինական պահանջին:
Գալեյանի ներկայացուցիչն ասաց, որ ծնողները սեպտեմբերի 20-21-ին պանթենում իրենց որդիների շիրիմներին են այցելել:
«Ոստիկանները 5-6-ի սահմաններում եկել են պանթեոն, բիրտ ուժ կիրառելով, տեղափոխել են Ոստիկանության բաժին: Ոչ զգուշացում է եղել, ոչ ժամկետ է տրամադրվել»,- նշեց Գալեյանի ներկայացուցիչը:
